مراجعه لكريم اساس ديور |DIOR FOREVER - NUDE SKIN GLOWING

مرحبا للجميع 

بكرت بتنزيل البوست عن كريم الاساس قبل العيد للي محتاره اي نوع تاخذ خصوصا اوقات المناسبات .

تدوينه اليوم عن اثنين من اساس ماركه ديور (DIOR).

النوع الاول نود او يعطي مظهر التوهج و اللمعان للبشره، الفونديشن لا هو خفيف ولاثقيل طبيعي

تغطيته متوسطه يغطي بعض الشوائب بس اذا فيك اثار غامقه جدا ماينفع يندمج مع البشره بشكل سريع للي تحب التوهج

مايحتاج تثبتينه بالباودر انا عن نفسي احب التوهج و الفنش اللميع شويات واضيف هايلات بعد عليه .

شوفوا البنت هاذي تشرح تجربتها وتشوفون كيف طبيعي لما مدته على البشره صفاد ورونق جميل.

( قبل اي اساس وسعره غالي تشترينه ابحثي عنه وعن بشرات قريبه للون بشرتك جربي كثير لين تقتنعي).

الخص تجربتي عنه :

ـ جربت امده على بشرتي بالكابوكي فلات و البليندر اندماج بيرفكت .

( حلو انك تمدين اساسك بالفرشاه وبعدها ترتبينه بالاسفنجه يعطي اندماج جيد)

ـ حطيته على بشرتي مع برايمر او بدونه اكتفيت بالترطيب كانت النتيجه واحده .

( مهم جدا جدا الترطيب وتهيئه البشره والا انسي الاساس يترتب ويطلع بيرفكت انا كرهت الاساس والميك اب لما خربت بشرتي جفاف وحبوب وبهتان حاجه تضايق يعني اثار الحبوب اهون علي من المشاكل الثانيه).

ـ التوهج ملوحظ ولكن مو شي اوفر ومبالغ فيه وكنه الوجه مدبق لا الفنيش جيد واذا تبين مات حطي باودره خفيف خفيف.

ـ عندي في الرقبه حساسيه اعاني منها دايم احمرار ويقلب بني زي الخطوط الرفيعه تشكلت عندي ما اخفاها لي بشكل كامل.

ـ اقدر اقول ان تغطيته متوسطه للبشرات اللي تعاني من مشاكل وكامله للبشرات النظيفه الخاليه من العيوب نفس اليوتيبرز اللي بالفيديو.

ثباته عالي ويجلس اكثر ساعات  مايتغير بصراحه حبيته كثير سهل الدمج سواء بالفرشاه او بالبيوتي بليندر

بامكانك دبل الطبقات بس ما انصح فيها خذي كفايتك من اول مره عشان مايصير كنه مشهب كذا.

رائحته : خفيفه ماهي مزعجه .

عدد درجاته : ثمان درجات قليله الدرجات.

سعره: ناسيه بس 200 وشوي اتوقع .

النوع الثاني :فور ايفر هذا الحب الجديد فعلا.

لما رحت اجرب كنت حاطه في بالي ديور وشانيل وكنت ابي بوبي بروان بس وقع الاختيار على ديور

المسؤوله عن ماركه ديور على طول اعطتني هذا و عطتني نوع ثاني بس الاول ماهضمته 

حسيت ارتحت لهذا اندماج فضيع بشكل حبيته وناسبتني الدرجه اللي اخترتها وماتعبت وماشاءالله بناتنا بدوا يتعلمون اكثر ويفهمون خصوصا بنات سيفورا الظهران في ثنتين او ثلاث حسيتهم جد يعتمد و تساعدك بالاختيار للي ماتعرف او تقع في حيره حزتها.

واكيد اي انسان بيدرس ويبحث راح يكتسب خبرات ومعرفه اكثر.

الاساس هذا قالت انه ثقيل ينفع للمناسبات اكثر يعني بيتعب البشره يوميا عن نفسي ماحسيته ثقيل مره

وانا لو بضطر استخدمه كل يوم راح اخفف الكميه اللي باخذها ومع البيوتي بليندر راح تسحب كميه من الاساس.

شوفو الفيديو وكيف مدى تغطيته للحبوب اللي بوجهها .

ـ الاساس هذا تغطيته عاليه جدا جدا يخفي جميع الاثار والحبوب والاماكن الغامقه في بشرتك فعلياً.

ـ الفنيش مخملي وجه صاف على قولتنا قطعه وحده اندماج موطبيعي احب بشرتي معاه النتيجه ترضيني وتسعدني.

ـ مايحتاج معاه باودر لان الفينش مخملي ولو حطيتي باودر احس بتروح النتيجه اللي طلعت معانا .

ـ انا اعترف عشقت الاساس جدا وماراح دراهمي عبث ههههه يستحق كل ريال فيه .

ـ ثابت ومايتغير او يتأكسد لمده طويله يعني اطمني لما يكون عندك مناسبه .

ـ اخاف اتكلم كثير وتقول هاذي ترفع فيه كثير لكن انا اقول الصدق واللي انا شفته.

ـ جربته مع برايمر او بدون التغطيه فل الفل تغطيه كامله وما تغير شي بس مع البرايمر يصير اسهل اكثر .

ـ يحتوي على 12 درجه من اللون ممكن تقيد البعض للي درجتهم بالنص وتحتاج لدمج .

ـ رائحته عاليه شوي اول ما تمدينه بس بعدها تخف .

ـ اذا كانت بشرتك جافه هيئي بشرتك بشكل كويس وحطي برايمر وادمجي مع الاساس قليل من المرطب.

( اتمنى جمعت ووضحت جميع الشغلات البارزه لهم كلهم واللي تفيدكم اثناء اقتناء الآساس).

سعره: 200 وشوي ما اذكر بالضبط .