امنيات و احلام في عام ٢٠١٥ | تأملات سعيده لعامٍ سعيد |

ترددت في الكتابة كثيراً ، لي مايقارب الاسبوعين اتسآل هل اكتب أو لا ؟!.

قلت وش اكتب او وش اللي راح اضيفه و يستفيد منه القارئ، و بنفس الوقت اقول لنفسي مو شرط يكون له ذيك الفائده

و ممكن البعض يستفيد و ممكن ناس توافقني في بعض كلامي اقلها اقلها تستمع بالقراءة، والأهم الأهم قلت اذا ربي

عطاني عمر لنهاية هالسنة اشوف نفسي هل انا مثل ما انا او حققت شيئ !!.

( حسيت اني ماراح ارتاح لو مر هاليوم و ماكتبت شيء احتفظ فيه لأعوام ) .

يبقى شي للذكرى للآيام والأعوام القادمة للآجيال من بعدنآ، في زمنا الحرف و الكلمة مع السوشال ميديا تختفي مع الزمن

الخواطر، المعلومات العلمية ، و غيرها ، او حتى ممكن تتعرض للسرقه و انتسابها لشخص آخر بغير حق .

قبل كم سنة كنا نستفيد من المواضيع اللي تطرح في المنتديات بأي قسم كان و كان فيه هناك منتديات لها مكانة ولا زالت

ولكن الأغلب مال الى البرامج بحكم انها اسهل و اسرع شيئ طبيعي تعتبر مواكبة الزمان و سرعته، بس الاسهل عندي صفحات المنتدى  اذا بغيت طريقة شي او احتاج معلومة اروح لقوقل و الشي اللي صار يفرحني يطلع كم موضوع

في قوقل من احد المدونات العربيات والله شي يفرح لو نستمر على هالنمط راح نملأ الساحة بالتجارب و المواضيع الهادفة، احيانا اذا براسي شيء او معلومه ابي شرح لها او آراء اكتبها باللغة الانجليزية لأني عارفة راح توصلني للشي اللي ابغاه بشكل اسرع

و تكون صحيحه وابحث عن الافضل والافضل لين احس وصلت للنقطة اللي كانت مبهمة عندي .

فِ شيئ جميل و مفيد و مشّرف للعرب ننشر و نحتفظ باللي تعلمناه و استفدنا منه خلال حياتنا .

( حلوه المشَاركة و التفاعل مو شرط ننتظر شُكر الاهم نترك اثر طيب للي بعدنا خصوصاً ان الناس تمل من قراءة الكتب

و المراجع و استنباط المفيد منها ) .

في السنوات اللي مضت كلها ما مر علي منتدى الا وشاركت فيه و اضفت كذا موضوع و اوقف

او اهستر شوي و اسجل خروج و اطلع و السبب ما ارتاااح فيهم و مع الآسف اغلبهم انقرضت محد اهتم فيه و تتقفل

خسارة المواضيع اللي كانت فيها و الناس اللي تكتب و تصمم وقتها كان هبة الفوتوشوب و التصاميم وطرح الدروس .

لين جا في بالي اسوي لي صفحة في التمبلر و صممت لها تصميم فرحانه فيه كان متواضع بس كبير في عيني

اضفت موضوعين هذا الكلام اتوقع في ٢٠١٢ بس بعدها اكتشفت عالم ( البلوجر ) كنت فقط اتابع يوتيبر من اوائل اللي كنت اتابعهم ( كاميليا اتوقع اسمها كذا البرازيليه وين كانت ووين صارت تطورت بشكل ، و دولسي كاندي ، كارلي وفيه كذا وحده ماتحضرني اسمائهم ) . الين اندمجت كثيرر و ماصرت استغني عن القنوات في اليوتيوب فيها فائده كبيره ، و قررت في عام ٢٠١٣ افتح المدونه حقتي بدون اي تخطيط و تفكير قلت بمشيها باللي احسه بيطلع معي بس كان خطأ فادح و انقطعت مايقارب ست سبع شهور لظروف كل شيء تطور والعالم ماتحب تنتظر مافي شي بيتوقف .

بعدها بدأت بالترتيب تدريجياً التغيير في تصويري و طريقة السرد و الوصف بس لازلت ماني راضية ان شاءالله اقدر

اوصل للي انا اتمناه فيها .

( يهمني الانجاز و تحقيق الهدف عشاني انا مو عشان احد آخر ) .

الآكيد اني اطرح تجارب ابي البعض يستفيد منها بس بنفس الوقت هذا انجاز لي اني اوثق واطرح سلسله مرتبه من المواضيع ممكن بيوم تكون مهمه يكفي اني اسطر تجربه شخصية لمنتج بدون مقابل لا مادي و لا معنوي، في بادئ الأمر حسيت التدوين سهل لكن ابدااا مش سهل الموضوع كله التزام المصداقيه موجودة الحمدلله و عندي قدرة بوصف شيئاً من المنتج يعني اعطي زبدته هل ينفع او لا ، كنت فرحانه اني راح اكون معروفه عند البنات و راح آلاقي شيئ من الاعجاب لطرحي لكن مع الأسف لا ما شفت الا القليل لما فكرت و راجعت طرحي حسيت يحتاج المزيد و المزيد من العطاء  وانا قادرة على ذلك ، لا التدوين  ولا الظهور المتقطع بيفيد طرح التجارب على الملأ و الظهور بشكل عام لابد من مجابل نفس مايقولو الكويتيين مو لعب حطيت مكاني مكان متابع ممكن يحتري شيئ من المدون يمر اسبوعين شهر لا يوجد طرح اكيد بيطفش صح محد مجبور لا بزمن و لا بوقت بس الشغل شغل في تجارب مدتها تطول لشهور المفروض اطرح شيئ تعويضي ( علمي نفسك طيب !! ) .

هذا الكلام لي و لغيري للي يبي يستفيد و الحديث يطوول لكن بس كافي احس مسختها .

ايضاً من خلال هالحكي عرفت انه محد بيفيدك الا بمقابل توقعت آلاقي صداقات حقيقيه في هالعالم لكن القليل القلة .

بجد مو بس انا تقول هالكلام اكييد غيري كثير يعني اذا تبيني افيدك انت نفس الشي او ادفع انا بالفتره اللي مضت كنت بقفل المدونه افضل من اني اهجرها و السبب ما القى تفاعل بس لما عدد الزيارات يزيد انبسط انه في احد يطل

حتى لو ما قرأ صح بين وقت و الثاني تجيني استشارات من بعض المتابعات كان شي مفرح انه احد استفاد او وثق باللي تقدمه، انا كان هدفي توسع و غيري يتعرف على مدونتي اكثر الهدف مش بزيادة العدد بالعكس الهدف من ذلك التشجيع

و الدعم المعنوي لكن مع الأسف صرت استحي ارسل لأحد لأني عارفه ردها شفت ناس سطحيه وناس تهمها المظاهر بشكل انا ما اجبر احد يدعم مدونتي لكن اقل شيء ردي حتى لو مجاملة مو تسحبين او تماطلين وكآنه مافي غيرك بهذا المجال !!

احيانا اطلب دعم بفلوسي انا مو ببلاش او آلاقي رد ان طرحك ما عجبني او متابعينك قليل بس بطريقة مبطنه طيب ياقلبي ليش انا جايه !!! عشان ازيد التفاعل خصوصاً ان المجالات محدودة اذا انتي يابلوقر او انتي اللي عندك متابعين مادعمتي غيرك كيف بنتطور و كيف المدونات الثانيه راح يعترف فيها من بعد !! .

بجد بجد ضايقني هالموضوع هالسنه توقعت شي بس ماآآش لا زلنا نحتاج الى رقي و تعاون اكثر حتى غيرنا يتعلم منا

لأنه نمثل شيئ راح يكون كبير في هالعالم و فيه غيرنا يشوف و يقارن بين الدول ايضاً لما آلاقي بعض الناس في أي مجال تقلل من قيمة المتابعين اللي هم احد اسس نجاحه وشهرته بالتطنيش او الكلام الغير لائق خصوصاً لما يزيد العدد ، عادي خصص اوقات او ايام لهم لارضائهم وتقديراً لهم ما تابعوك الا من محبتهم لك مايبون الا كلمة طيبه فقط بالعكس انت مجبر على ذلك .

اللي بقوله الأنسان يعتمد على نفسه ويجتهد وايضا الأشخاص اللي تستحق التقدير و ناس مقدرة ذاتها لهم دور والحمدلله في ناس تعاملهم راقي مثلهم و الله يكثر منهم .

امنيات و احلام :

الامنيات لا يمكن حصرها ابداً تزيد بحسب حاجة الفرد ، اما الأحلام مع صُنع خطة واضحة و رصد الأهداف

بإذن الله راح تتحقق مافي شي مستحيل و مافي شيء يجي بسهوله انت تحلم و الحلم تبيه واقع يعني بتجره من خيالك

الى واقع مرئي حقيقي بالأول و الآخير التوفيق من الله بس ما يمنع انه نسعى لذلك .

كانت احد اهدافي لعام ٢٠١٥ اخذ كورس باللغة الانجليزية او اتعلم تعليم بالمنزل من خلال قنوات ودروس التعليمية. 

صح الحمدلله تحسنت قدرت احسن الاستماع عندي لو بالشيء البسيط بس افرح اذا عرفت الكلمة و نطقها حتى لو ما اعرف ايش المقصد و عاد اطير فرح اذا كنت عارفتها اتحمس اكثر احتاج حصيله كبيرة من الكلمات المتدوالة بما اني بلوقر

عربية احتاج كثير للغة في خلال بحثي و ردي على الايميلات اللي تجيني لابد من تواصل باللغة الانجليزيه و حتى مهمة في حياتي اليومية بس مشكلتي ما التزم الكسل و الطفش يسيطر علي جد ازززعل على نفسي لما يمر اسبوع و ماحققت انجاز بسيط في اللغة اقلها احفظ خمس كلمات اللغة كانت حلم منذ الصغر كنت احلم لكبرت ادخل تخصص انجز وبعدها اصير مترجمة في احد الشركات كبرت و حلمي معي بس مع الأسف اعتمدت على دراستي  اللي ينقال في المدرسة ما توسعت و لا احد شجعني اقل شي اكتسبها، و جا اليوم الموعود حصلت على نسبة جيدة ٩٥٪ نسبة تدخلني بالراحة لتخصصي و احقق حلمي ذاك كان اسوء يوم جاني الرد منهم انهم اكتفوا التخصص فل الفل آاااه بس دوروني صحت من قهرري للحين اتذكره كنه امس اخترت اجتماعيات و لغة عربية  لإنه ماكن فيه غيرهم بالجامعة على زماني ، كلها ما احبها لما كنت ادرس بس كنت احبها غصب عشان انجح خصوصاً التاريخ احس شرحهم ثقيل فيها بالرغم اني احب اسمع احداث وقصص للأزمنه الماضية بس ذيك الحصة تجيب النوم .

وربي كتب و ادخل عربي اول شهر ثاني شهر ما لي نفس مرت سنه اهمال مدري كيف نجحت ، صارت لي عقبات كثيرة

بس ابداً ماتوقعت تصقل بعض الشيئ اللغة العربيه عالم واسع وكبير مو بس نحو و صرف فاعل مرفوع بالضمه و قال الشاعر اللي يحبه اكيد لمس هالشي مثلي بالرغم ماني كارهه له حتى اذكر من رابع ابتدائي وانا شاطرة و المعلمات يمدحون فيني خصوصاً بالنحو لدرجة اروح الاختبار فقط اراجع مراجعه سريعه تثبيت معلومات ماكنت اشيل همها زي صديقاتي بس سبحان الله الإنسان يغفل عن اشياء وربي كاتب له غير لعلها تكون خير عليه،  لكن عصبت لإني مادخلت اللي ابيه واحبه كان في جانب ظهر فجأه لما كان عمري ١٦ سنه تقريباً شي يجرني للكتابة اذا ضقت او زهقت احس احتاج قلم وورقه اكتب فيها و فعلاً اكتب ما يجول بداخلي خاطره ، عبارات ، حكي ما ينقال باللسان .

فيني هذا الحس لكن عند الحاجه يطلع  يمكن كان خيرة لي ادخل هالقسم لأشياء غافله عنها والتفت لها .

لعلي في هذا العام احقق هذا الهدف ....

مشروعي الصغير :

في عام ٢٠١٤ قررت اسوي شي بالحياة استفدت من الجانب المحبب عندي و رسمت خطة صغيره بدائية و الحمدلله

افتتح المشروع و اقبل على بالخيرات و لله الحمد و لكن بعدها ما قدرنا نسيطر عليه او بمعنى اصح اهُمل بعض الشيء و ماعجبني الحال ماوصل للمستوى اللي طمحت له و وقفته في منتصف هذا العام بدال ماتطيح سمعته اما للتطوير او للألغاء تماماً كانت فترة جميله متعة الوصول للهدف و الانجاز متعة العمل ماتنوصف قيمة الفلوس و اعتمادك على نفسك كلها مرغوبه للجميع ، فقدته كثير حسيت اني ضايعه وحده فاضيه ماعندها شيئ على اني مش فاضيه فعلياً بالعكس عندي التزامات بس لابد من الاستقلاليه و العمل و الانجاز الشخصي ودي بشي يبقى لي شي افتخر فيه بحثي جاري للوظائف اللي تناسبني أو لفكره قوية ارجع افعل نشاطي في مشروعي فيه فرص جتني لكن رفضتها بسبب تخوفي من بعض الشغلات لكن ندمت بعدها !!

المشروع لم اصّرح فيه بشكل رسمي لإنه بالآخر ما وصل لشيئ اقدر اتكلم عنه ماكنت راضية عنه تمام الرضا .

عملت خطط كثيييرة بس ما تحققت لأن مالها مكان راح تطيح بعد فترة وجيزه كنت اتحطم وازعل وارجع اخطط وابحث لشيء جديد و هكذا لين احس العام انتهى !!!.

في عبارة قرأتها من قريب(  لا تجعل يومك يقودك  )

فعلاً يومي هو اللي يقودني و مزاجيتي اللي تقلب جوي و تعفسني اكون مخططه انجز او حتى اكون رايقه لنفسي

و للي حولي بعد وش ذنبهم انفّس عليهم بس احيانا ما اقدر و احيانا بلا خطط انجز افرح اذا سويت اكثر من شغلة

باليوم استبعد الايام اللي اكون طفشانه فيها حتى من نفسي و الأيام اللي تلخبط المزاج عارفينها طبعاً  ( ... ) .

قررت اكتب ادون مهامي اللي بسويها بيومي السبب الأول انسى وش ابغى اسوي كثيرة النسيان صايرة خصوصاً اذا ماكان دارج بيومي و السبب الثاني عشان اسويها صدق خلاص قدامي مكتوب اجباري اخلصه و افتك

و الحمدلله مشت معاي انا جربت نفسي قلت اذا حسيت بتنفع معاي راح اتعنى و اخذ لي بلانر عادي اجرب اكتب خططي واهدافي على ورق بدل ماتكون بس في راسي و يمكن تتلاشى و اتكاسل مع الأيام .

و اخذت لي بلانر سبق و نزلته ريفيو سريع في السناب راح اطرح تدوينه عنه عشان احمس نفسي و احمسكم.

نظام التخطيط شيء مهم عند الاجانب ياكثر ما اشوف باليوتيوب مهتمه فيه و تنسيق البلانر حقهم .

تعتبر شغلة جديدة في عامي الجديد .

تأملات لعامي الجديد :

عام ٢٠١٥ لو بتذكر ايامه الحلوه كانت قليله ايامي الضايعه بالفاضي مابين الضيق و الهم و التفكير و الطفش من الفراغ ندمانه كثير اني ماسيطرت على نفسي قليلاً تمنيت ايام اجمل و أفضل بس الحمدلله على كل حال تبقى من عمري وذكرى بالمختصر ماكنت راضية عن نفسي بالشكل المطلوب .

انا احس بداخلي ان هذا العام سعيد وجميل متفائله جدا بإذن الله:

- اتمنى في عامي الجديده الأمن و الأمان علينا لإنها السبب الرئيسي للسلام و الراحة .

- انجازات كثيره ماراح اذكره الان بس راح اشارككم فيها اكيد .

- احقق أهدافي اللي كتبتها .

- اعيش بسلام داخلي .

- اتحرر اكثر في التدوين و لا اقتصر على نمط واحد .

- اقدّر الوقت و الأيام اللي تمضي من عمري و انا فاضيه و كأنها تحمل رسالة نحوي .

- اتمنى ايام ايجابيه لا ظروف و لا مزاجيه .

ارجع و اقول مافي احد احسن من احد اللي بيتعب على نفسه راح ينال اللي يبيه بإذن الله.

احس براحة اني كتبت هالكلام عشان ما اكره نفسي  << مش للدرقه دي هههه

عام جميل و سعيد للجميع و اللي ماقدرتي تسوينه بالأعوام اللي مضت حاولي تسوينه هالسنه وان ماصار العام اللي بعده و تستمر الحياة سواء بأهداف، بفرح ، بحزن بس اقل شي اصنع شيء تحبه 

( اصنع ) كلمة صغيره كبيره تعتمد على الشخص نفسه يصنع الذي يريد ويتمنى بدون قيود .