وجَهي كَالبدر فِي الخيَال

" يُحكى أن هُناكَ فتَاه بهآ القدر البسيط من الجمَال، دائماً تحلم بأنها ملاك و تشبه الحسناوات ذوات الجَمال و الأنوثُه الطاغَيه، كَانت دائماً تنسِج فِي مخيلتهَا بأنهَا جميله بشعر طويل كالحريرْ، و ذاتَ عُيون زرقاء واسعه، و قوام ممَشوق،  تتَغزل بنفسهآ تَاره، و تتراقَص تَاره بخطَوات ناعَمه، تتخَيل و كأنها هي الجميله في هذا العَالم، و ماهِي أن تقطَع خيالها و تتأمَل نفسهَا بِـ المرآه و تتلاشى ابتسامتها و يملأها الاحباط و الحُزن لإنها اختفَت الصُوره التي كانتْ بمخِيتَلها ذلك الوجَه الناعِمْ الجمَيل فتعُود لقوقعَه البؤٌس ..... " . 

بعض البنات تشعر بمثل هذا الإحساس تحس بالنقص تقارن نفسها مع زميلاتها او خواتها وقريباتها، تناظر نفسها بالمرايه تشوف تصبغات والا كلف و الاحبوب تكره نفسها وتضيق مو بس على هالأمور عيونها صغيره او قريبه من بعض شفايف غليظه او رفيعه و ما إلى ذلك .

محد راضي عن نفسه دايم يشوف نفسه ناقص و يتمنى يكون نفس مواصفات الثاني و الثاني يبي يكون نفس الثالث ، دايم ينقص من نفسه وبعضهم فيهم هوس بعمليات التجميل نفخ وشفط وشد ومط ومنتشر بشكل بصراحه، طيب وبعدين !!! ملامحك الحقيقيه تمثلك انت كما ربي خلقك ليه و التغيير و المشكله إلى متى !.

( إلا ان كان هناك مايستدعي للتجميل لـ عيب خلقي ) .

بعض المشاكل نقدر نحلها بس الأهم التصالح مع النفس والقناعه انتي ياللي شعرك مجعد وكيرلي اهتمي فيه كثير يتمنون نفس شعرك كيرلي طبيعي اهتمي بترطيبه و لمعانه متأكده راح تحبينه، ياللي عيونك صغيره من قال الجمال بالعيون الوسيعه والا الخشم النحيل وما الى ذلك .

بصراحه مالومهم هالبنيات من كثر ماتسمع في التجمعات النسائيه والا من الحريم فلانه وش زينها بيضا تلقق 

فلانه شعرها لآخر ظهرها فلانه عيونها عيون المهآ خلاص البنت تأزمت تناظر عمرها بالمرايه تشوف وش الزين فيها اللي يلفت و يبهر الناس ولا زالت مستمره هالمقارنات الجماليه عند الحريم يبحثون على البياض وخلافه المقاييس الجماليه  ما تتغير عند الأغلب .  

لكل شخص معالم جمال بس يهتم فيها و يحاول يبرزها،  بعض البنات تعجبني ابتسامتهم لما تكون اسنانهم الاماميه مايله او فيها زي كسره كأنها رقم ٨ على تحت احسهم جميلين .

تبين تبرزين جمالك أياً كان قدر جمالك اهتمي بنفسك 

حطي مليون خط تحت اهتمي كثير نقراها و نسمعها كيف نهتم طيب !!! 

شوفي اللي يحتاج اهتمام بشكل مكثف والشي اللي بيكون اهتمام عادي او روتيني. 

عامل اساسي تلقين العقل بالعبارات التي تملأ النفس السعاده امدحي نفسك لا تنتظري احد يمدحك، دامك عارفه مواطن جمالك و حاولتي اخفاء عيوبك اللي تضايقك اذاً انتي جميله . 

الجمال يعني النظافه نظافتك من راسك لإصبع رجلك.

الجمال له فروع أساسيه و ثانويه امشي بالأساسيات ومعروفه ايش الأساسيات لدى الجميع .

استيقظي من الأوهام : 

فيه فئه تغوص بأوهامها كثير و تتخيل و تشطح و تصدق خيالها، وتغالط الكل بسبه هالخيال و الثقه الزايده او الثقه الغلط تجيك الوحده تتميلح بشكل مقرف هو غرور هو ايش اسميه الا انا الحلوه والكشخه و المشكله تلاقيها فاهمه بالمقلوب لا هي حول الفاشن او الذوق حتى لو إنك ملكه جمال هاذي تخرب عليك جمالك ماشفع لك مع الأسف او يكون العكس لو بنعمل مقارنات بيطول الحكي، الاتزان في كل شي، ممكن وحده تشوف نفسها احد هالمشاهير اللي لهم كاريزما وجاذيه نقول مثلاً هيفاء خلاص تشوف نفسها هيفاء ويلا محد قدي وهي تحتاج الى تصليح وتعديل بكذا شي فيها، يا كثر مانشوف هالفئات، الغرض من هالحكي مو التحبيط لا ابي كل وحده تشوف نفسها كما هي مو تناظر بالمرايه وجهها الطبيعي و بخيالها مره نانسي مره اليسا، لإن بيجي ذيك اللحظه اللي بتحبطك وتقولي لنفسك انا مو حلوه انا شينه والسبب إنك ماعرفتي لنفسك ولا حتى تصالحتي مع ذاتك و شكلك غالبيه هالمشاهير لهم كاريزما و تفاصيل تختلف عن الأخريات اكيد طبعاً عشان المعجبين و اختلاف الأذواق و كل معجب للفنان هذا حاب يقلده خصوصاً ذو الهوس الشديد، طيب انتي اعملي لنفسك كاريزما وجمال خاص فيكِ انتي العالم صار يتشابه صرت اشوف نفس الخدود نفس البراطم الحواجب ليش كذا ونفس الميك أب ليش كذا !!.

التصالح مع النفس :

افهمي نفسك و اعرفي تقاسيم وجهك وجسمك واسعي على اللي يصلح و يتماشى معها ابحثي عن اشباهك وايش اللي يناسبك ويناسب ذائقتك، ابداً لا تقارنين نفسك بأحد لا تقولي هي أجمل مني لا قولي هي اشتغلت على نفسها و ابرزت لك ولغيرك جمالها بالطريقه اللي ناسبتها .

ابدأي ابحثي عن الأشياء اللي مضايقتك و اصلحي فيها 

مليانه سوي لك برنامج دايت، بشرتك شعرك شوفي وش تحتاج، وصلتي للنتيجه اللي تبينها لا تخسرين تعبك و ترجعي لنفس النظام لا استمري بالروتين عشان تكوني راضيه عن نفسك دائماً الشعور بالرضا شي لا يوصف . 

مهما تحطمتي او حطموك اللي حولك ابداً لا ترضخين لكلامهم لا لون بشره و لا نعومه شعر ولا طول القامه بتخليني ملكه جمال فقط اعرفي مفاتيح جمالك أين تكمن و أظهريها .

( اسعي للتحسين و الاصلاح لا للتبديل ) 

احقني نفسك دائماً بجرعات تنعشك وتزيدك حيويه وتشعرك بأنك جميله .

دائماً اتركي وجهك في خيالك وحقيقتك كالبدر الى متى بتخلينه بس خيال !.

"كل أنثى جميله و تستحق أن تكون جميله "