انتِ أنيقه بدون ماركَات

انتِ أنيقه بدون ماركَات ..

مرحبا يا أنيقات ..

العنوان ممكن غريب او ماله داعي لدى البعض للي بتقراه بس انا لفت نظري من خلال السوشال ميديا بالاخص الانستقرام البرنامج اللي الاغلب مو الجميع يميل لتصوير المحل الفلاني الماركه الفلانيه مدري هل انا الوحيده اللي انا اشوف والا غيري بعد !!

احس الاذواق تشابهت بشكل كبير كبير الديكور الميك اب سواء اقتناءه او حتى تطبيقه على الوجه و الازياء اروح مكان الاقي نسخ نسخ من نفس اللوك الانستقرام اتصفح الحسابات نفس الشي لدرجه اني اشك هالصوره لها او لا لاني شفتها بحساب ثاني من كثر ماهي مشابهه لها !!

الهبه اللي احسها لا زالت مستمره ايكيا و نيكد والاي لاينر و الروج الغامق وغيره كثير .

ما اختلفنا ان هناك خطوط لامعه و سائده على الساحه بس يا ترا هالشي اللي سويتيه ناسبك ؟ 

يناسب عمرك ، جسمك ، لون بشرتك ؟.

اتمنى تفكرين اول بالأمور هاذي لإنها مهمه ، انا الآن ألاحظ في المجتمع البناتي بين قوسين اذا كشخت والا تضبطت بالحفله الثانيه عشره زيها نسخ من الفستان و لوك الميك اب بصراحه أنا ما حبذ هالشي وين الميزه في الطله! 

لكل شخص لابد تكون له أساسيات و تنسيقات خاصه فيه طيب ما اختلفنا هذا الموجود وهاذي الموضه اللي هابين فيها، بس لا تقلدين وتصيرين نسخ من غيرك بالطله و اللوك استوحي و اقتبسي اللي يفيدك و يجملك لإن البعض مع الأسف يزين شغلات ابداً ما تناسبه لا العمر ولا الجسم .

اتمنى فاهمين علي وش اقصد.

( لكل إنسان ذوق و نظره تخصه هو صح ممكن ينعجب بشغلات وحاب ينفذها لكن مو بالشكل الفضيع اللي صايرين نشوفه عند الأغلب ) . 

- كوني أنيقه بدون ماركَات:

كتبت هالعنوان ولا كنت مرتبه اي شي ادرجه تحت 

بس حنا كـ بشر النفس طمّاعه و تحب تقتني أي شي وما ابي اروح بعيد بتكلم عن نفسي أنا لو اروح السوق ودي اخذ كل شي يعجبني و ياكثر الأشياء اللي تلفت نظري بس مثلاً اكون طالعه لغرض معين و حاطه له المبلغ المعين و مرات اروح على عماها بشتري لين تخلص فلوسي واذا اضطريت اخذ من اللي معي بس اهم شي ماحطه بخاطري طيب الى متى !!

كل مره كذا، حلو الشخص يرتب كل شي يفكر بكل ريال وين نصرفه وو ين يحطه لازم يكون عنده أولويات ايش احتاج هالشهر وايش ناقصني . 

مثلاً ميزانيتي هالفتره بسيطه خلاص اتوجه للمكان اللي يناسب ميزانيتي عشان اقدر اشتري النواقص كلها مو اروح لشي يخليني اشتري غرض واحد وكان بإمكاني اشتري اكثر من غرض فيها صح والا غلط كلامي . 

انا لما يكون معي فلوس ما احاسب اشتري واحياناً بغرض الاقتناء مو شرط الاستخدام بس لما تقل فلوسي ابدأ احاسب على كل قرش وين اوديه . 

صايره احب نفسي لما تكون معي فلوس قليله بس اشوف الناقص واخذه وبس بدل ما اكدس الاغراض عشان كل فتره اجدد والاشياء اللي قبل خلصت .

- نجي للنقطه الأهم وهي أساس الموضوع :

مو ضروري تكونين حلوه و ملفته باللبس من الماركه الفلانيه و الا الشنطه الفلانيه والا بشرتك راح تزين والا بتروح الحبوب من الماركه المعينه لا طبعاً هالشي شيليه من بالك في ناس لما تسألينهم ايش الكريم اللي تستخدمينه على وجهك ممكن تقول ما احط الا نيفيا والا مثلا المرطب حقي الفازلين و ما اكذب عليكم حريم الاول وش عندهم وش يعرفون الا الفازلين والا نيفيا يتدهنون فيه والا للشعر كريم ذاك اللي يجي علبه حمرا وخضرا وكريم ابو ورده ،امي لا زالت على الفازلين وش زينها وش زين بشرتها ماشاءالله وان كثرت حطت جلسيرين وبشرتها ما شكت من شيء وكلها قيمتها رخيصه جداً عكس اللي انا اشتريه، اختاري اللي يناسبك على حسب قدرتك و وضعك لا تكلفين على نفسك و تضغطي على اهلك او تحطي راتبك كله عشان تتجهزي لحفله عشان كم ساعه وتنالي المدح على شوزك و الا شنطتك . 

كل شي بسيط يلفت الانتباه .

مثلاً اعملي موزانه لما تتجهزي لمناسبه .. 

انا اتكلم عن الاشخاص اللي ميزانيتهم محدوده ما اتكلم عن الجميع طبعاً كل شخص حر نفس "

مثلا تختاري فستان يكلفك القليل ويكون بسيط وألونه تناسب الطلعه اللي بتطلعينها و اعكسيها بشوز لون مختلف عادي لو اخذتي جوده عاليه لإنك راح تستفيدي منه اكثر من مره و يدوم معك لفتره و هكذا قيسي الأمور . 

حابه تقتني شي عليه القيمه خذي الشغلات الأساسيه و اللي راح تستهلك عندك . 

 حافظي على اللي راح تقتنيه فكري كيف قدرتي تحصلي على المبلغ لا تهمليه أياً كان خليه يدوم لفتره حتى بعضها تكون لها قيمه عندك و تهدينه للي له قيمه ( بنتك ، اختك ، صاحبتك ) . 

بجد لما تفكري بالحفاظ على بعض القطع و تكون لها قيمه عندك ماتفرطي فيها زي مثلاً امي الله يخليها عندها بعض قطع السجاد او كم طقم صحون بالمطبخ من سنوات عندنا ولا تسمح لأحد يرميه صح ما نستخدمها لكن خصصنا لها دولاب معين مو حابه تفرط فيها . 

- كيف استطيع الشراء و مدخولي الشهري قليل ؟.

بدرج بعض الشغلات اللي انا استفدت منها في حياتي 

مو كل شهر بيكون عندك فلوس كافيه او احيانا يكون ماعندك يا ظروف يا انصرفت بشيء ضروري ومثلاً تكوني مخططه تشتري خاتم او شوز و فلوسها مو عندك او ماتقدري تاخذيها هالشهر ، شوفي كم قيمتها وابدأي ادخري لها خذي جزء من راتبك او مصروفك اللي من اهلك او اي قرش يجيك وخليه على جنب شهر شهرين لحد ما تجهزين المبلغ عادي مو شرط ناخذ اللي نبيه بيوم والا بشهر او حتى سنه اللي ماقدرتي تاخذينه الحين بيجي بكره بتاخذينه بس كل شي بخطط و تنظيم ممكن تطلعي هالسنه بكذا غرض او شغلتين حققتيها مثلاً ضبطتي اسنانك زينتي تقويم ، اخذتي مجموعه لشعرك التالف او بشرتك لإن بعض هالامور تكلف الشخص على حسب الكورس ثلاث شهور ست شهور وكل شي بحسابه ، مثلاً اقتنيتي جوال ، اخذتي تسريحه لغرفتك او اخذتي شنطه في بالك ،يابنات اعطي الشي قيمته و تذكري كيف حصلتي عليه صدقيني راح تحافظي عليه ، انا اول جوال مسكته بيدي اول مادخلت ثالث ثانوي هديه من اخوي وبعدها دخلت الجامعه ، واستلمت المكافأت وصرت احس بالمسؤوليه اتجاه نفسي وصرت اصرف على نفسي بقد ما اقدر ولا زلت على هالشي حتى بعد التخرج صار اغلب ملابسي وجميع اجهزه الجوال من مصروفي وفلوسي صح اهلي مايقصرون الله يخليهم بس احب اعتمد على نفسي بشكل ما تتصورونه .

حاولت اجمع اغلب الاساسيات وطرح بعض الأمثله و عليك الباقي تقيسي على حسب حياتك و طريقتك ، تذكري

- ان لكل شي حل ومهما ضاقت عليك راح تفرج.

-  لا تخلي شغلك الشاغل هذه الأمور اهم شي تكوني مبسوطه وراضيه باللي تسوينه مهما دارت بك الأيام و مهما جلستي لوحدك و تفكري بوضعك و حالتك تأكدي ان فيه ناس مو لاقين لقمه العيش ولا لبس يسترون نفسهم فِيه حافظي و استمتعي باللي بين يدينك قبل ماتخسرينه او ماتحسي بقيمته.

-  ارضي بالقليل بيجيك الأفضل بإذن الله انا اقول هالكلام عن تجربه واشوف هالشي قدامي .

( مو عيب تشتغلي اي شغله راح تفيدك وتساعدك الأهم انك تحققي لو هدف او تعملي انجاز، كلنا بشر وتجينا ضغوطات كل مره شكل بس الأهم نتغلب عليها، عطي نفسك راحه بس عشان تنجزين و تخطين خطوه افضل وثابته ) .