يَ مرحبا بِ الحلوات ..
شخباركم عساكم بخير ..
أضفت قسم جديد للبلوج في نظري أهم من الجمال والمظهر الخارجي لأنه لبّ أو ثمرة الأنسان أياً كان جنسه .
( أسلوب الحياة ) في هالقسم راح يندرج فيه تدوينات تشمل اجزاء متفرقه تهمنا كثير. ( ماراح أذكرها كل ماحسيت عندي القدرة بإتمام التدوينه راح أطرحها بإذن الله ).
تدوينتي اليوم بقد ما أقدر أحاول اطرحها بسلاسه بعيده عن الملل وبنفس الوقت لإستيعاب الفكرة .
إحنا هنا مثل الأخوات صح ماشفنا بعض وجها لوجه بس كل وحدة ارتاحت للثانيه من اسلوبها، بصراحة البعض ودك ماتشوفين وجهه ولاحتى طاريه موب كره أبدااا بس شخصيته المهزوزه والناقصه تنفر الناس منه، "أنا مااعني اهتزاز ثقته" لا اقصد اللي كلمه توديه وكلمه تجيبه مره معك ومرااات عليك ومنتفك تنتيف انا ديني ودين اللي ينافق ويضحك بوجهي والا الطامه الثانيه اللي يكون معك وش زينه قمة بالاحترام وفجأه يقلب عليك وتشين النفس ورفعة الخشم، وياكثر ماتصير سواء من قريبات أو اصحاب والمشكله تكون على شيء تافه أو سوء تفاهم أو حتى مايتسمى سوء تفاهم إلا هو اللي عمل هاللخبطه براسه.
ومنها بعد والمنتشر بالزمن هذا ( الغيـرة ) " الغيرة توّلد أشياء وأشياء " ينتج عنها الحقد و الحسد مثلا : فلانه ازين مني فلانه بشرتها تهههبل صافيه عاد إذا سمعت احد مدحها تنههبل وتقوم قرونها وتزيد حقد أكثر و أكثر الله المستعان.
نادراٌ نشوف الآن قلوب على بعضها لا من أخوات او صديقات وغيرة إلا العكس مانشوف الا الغيرة والنفاق وغير كذا
الحقد وصل إلى أمور محرمه وشرك بالله اللي هو ( السحــر ) يمكن الكل بيستغرب ويقول وش تخربط ذي متأثرة بالمسلسلات!!!
أي نعم في ناس كثير ضعاف نفوس وقلة الإيمان يلجأون له ونسمع دايم بالهسوالف وش كثر يضرون غيرهم بسبة شغلات تافهه بس إبليس ...."
طيب ماحد سأل نفسه ليه الحقد والحسد اللي مامنها فايده ؟؟!!.
إنتي ياحبيبتي تضرين نفسك أولاٌ بالهواجيس والأفكار المسمومه والتحلطم وتضرين غيرك بحسدك هذا ماتدرين إنه يوصل للوفاه
عند البعض!! الله الرازق ياختي أحمدي ربك على النعمه اللي أنتي فيها لاتجحدين اللي بين يدك وعينك على غيرك كذا وكذا مااستفدتي
شي حرمتي نفسك وما أسعدتي نفسك من اللي عندك.
حرام الإساءة للغير دائماً خلي على لسانك ذكر الله وماشاءالله وادعي ربك و الجأي له الله الرازق المعطي.
فقط تخيلي هالألم هذا بأحد من أهلك أو اخوانك!! وش بيكون شعورك ؟!.
*اذكر لكم قصه باختصار واقعيه لصديق أخوي ..
هذا الله يسلمكم لسه ساكن في منزل جديد وماشاءالله منزل فخم اللي حصل فيه أيش كل وقت والثاني يحترق جزء في بيته بدون سبب
محد عرف ايش المشكله الرجال جاب شيوخ سأل ناس يبي يعرف المشكله لين الله أوصله لشيخ سبحان الله قرأ في المنزل واكتشف
أنه فيه سحر بس وين لقاه ووش صار الله أعلم لأن ناسيه التفاصيل بس الآن أرتاحوا أصحاب المنزل .
شفتوا كيف يابنات كلامي واقعي ماجبت شيء من راسي كله بعالمنا ..
* العلاج بشكل أي إنسان يحس بالنقص وغيرة أفضل منه أجمل منه أجلسي مع نفسك أكتشفي مشاكلك حاولي تعالجينها
شوفي عيوب نفسك واهتمي فيها مافي أحد كامل ابدااا بس الشاطر اللي يطّور من نفسه أفضل من إنك تحسّرين وتحلطمين
الجمال مو كل شيء بحياة المرأه الأهم طلتك الانيقه المرتبه النظيقه بغض النظر عن مقاييس الجمال والكلام اللبق والحوار الجيد كلها أمور مكمله لبعض .
لو كل وحده فينا انشغلت بنفسها وتركت غيرها في حالها ماكان حالنا كذا النفوس ضايقه طول الوقت والحقد والغيبه منتشرة بينا ماكأننا مسلمين متحابين والإسلام حت على ذلك ..
أتمنى التدوينه تنال على إعجاب من يقرأها ويكون طرحي لامس قلوبكم .
من أعجبته ويود الإكمال بأمور أخرى يكتب رأيه في التويتر أو الاسك
للتواصل معي : dalalmoh00@gmail.com