بلانر kikki.k | وصف و طريقة اتباع التنظيم و التخطيط

عام جديد و تغيرات جديدة ، احد هالتغيرات التخطيط الورقي اكتب المهام و الأهداف على ورق بحيث تكون قدام عيوني

و ما انساها او اتجاهلها، لإن الشيء كل ما كان قدامك تحس انه لازم تسويه ماراح ترتاح لين تنتهي منه.

انا بحكم نسياني وكسلي احيانا ما اقدر اسيطر على نفسي و اكتفي بالتجاهل و التقاعس و اسوي شيء ابدااا.

جربت اكتب مهام و اشغالي كل يوم بيوم و الحمدلله حسيت الوضع عجبني و يومي صار منظم، اصحى من نومي و اشيك وش اسوي اليوم من اشغال .

لو ما التخطيط مهم ما كان احد حثّ عليه ماهو هبة حقت سنه سنتين هو قديم بس قليل اللي يسويه ليش ما كل وحده تكتب النتيجه اللي وصلت من التخطيط مو مرتبط بموظفة و الا طالبه المهام والاشغال مستمرة طول ما انتي عايشة حتى نستشعر قيمة الوقت و ما يروح سُدى !! 

لا ننسى قول الحديث النبوي " عن عُمرِه فيِما أفنَاه " .

- مثال لتخطيط خفيف خلال يوم :

تجهيز فطور ملكي لنفسي او لعائلتي، اقرأ كتاب مع كوب قهوة ، آسوي سلطة ، ادرّس اولادي ، اخذ شاور ينعشني

و هكذا دلعي نفسك بالكلمات مو كأنك تأمرينها خصوصاً بالمهام أما الأهداف كُوني جدية اكثر اعطي كل ذي حقٍ حقه .

وشيء حلو نستمر عليه و نعّلم اولادنا من بعدنا منذ الصغر و نقتصر عليهم جزء كبير .

التخطيط فيه انجاز، فيه تحقيق المهام اول بأول

اهدافي ماهي طويله المدى حالياً فيه اللي راح تكون شهري وفيه اللي يومي يعني تصل لسنه كاملة فقط .

ابدي من الآن جيبي ورقه وقلم واكتبي وش راح تسوين لبكره لأسبوع صدقيني بيعجبك الوضع .

منها نتغلب على الكسل و التأجيل المستمر .

                     اهدف ذكية + تخطيط سليم + تنفيذ + تقويم ومراجعة = تحقيق النتائج .

بعدها بدأت بالبحث عن منظم البحث كان طويل تقريبا ثلاث شهور بشكل شبه يومي اشوف تجارب و آراء عشاق التنظيم لين وقع الاختيار على بلانر كيكي كي من ( هنا )  اخذ قلبي لما شفته عجزت اتقبل اي نوع ثاني خصوصا اللون الازرق يسمى ( آيس بلو )

لون مريييح للعين هادئ حبيته كثير تقريبا هو ولون نعناع فاتح بس الايس بلو اجمل .

وصف المنتج :

البروسونال بلانر ( تخطيط شخصي ) 

لون الأزرق المثلج مثقّب الجلد، يحتوي على ٢ من الجيوب الداخلية و جيب كبير، حجم لارج استخدام ابدي غير محدد بتاريخ و عام معين يستخدم مدة ١٨ شهر 

• القياسات: 240MM X 200mm العاشر 40mm و

• مصنوعة من جلد طبيعي

• جلد مثقب مع نمط تصميم

• مطابقة القطن بطانة

• إغلاق مسمار

• القلم حلقة مرنة

• 6 حلقة الموثق

• 2 جيوب داخلية * تصميم جديد

• 1 جيب كبير

• 18 شهر الأبدي التقويم

• قائمة المهام

• ملاحظات الإجتماع

• 4 علامات فارغة مع صفحات الملاحظات

• 2 ورقة لاصقة

• المفكرة

( مترجمة و منقولة من الموقع ) .

عرض المنتج بالصور :

هنا فكيت نوته المهام و حطيت مكانها ستكر طلبته كمان من عندهم، فيه شغلات كثيره و جميله يحتار وش ياخذ الواحد بس انا اخترت الستكرات اسهل و اسرع شي لإن ما اعتقد بقضي وقت طويل في تزيين البلانر يادوب ألوان و حركات خفيفه و اشكر نفسي عليها بعد هههه .

للاطلاع اكثر على الستكرات ( هنا ) .

الحجم لارج احترت بينه وبين الميديم بس اقسام اللارج اكثر في مساحة كافيه للكتابه اربع تقسيمات فارغه اضافيه

اقدر استفيد و اضيف حسب حاجتي .

هنا صفحة المعلومات الاسم و خلافه .

اول قسم التخطيط الشهري و بعده مباشره قسم الاجتماعات ويليه مباشره قسم المهام 

آخر اربع اقسام فارغه للإضافة و آخر البلانر نوته كبيره كما هو موضح .

آخر شي اكسسوار للبلانر دفتر الاستكر في منها لاصقه و منها لا تحتاج تثبيت

قناة لهم في اليوتيوب تستعرض فيها البلانرز و ملحقاتها ( هنا ) .

طريقة و مدة الشحن :

طريقه الطلب سهلة جدا اي كلمه تصعب عليه استعيني بترجمة قوقل، استفدت من طريقه وحده من البنات كاتبه بوست كامل

ماقصرت ( اكتبي بقوقل طريقه شراء منظم من موقع kikkik وراح تطلع لك ) .

المده ما طولت هم كاتبين من خمس ايام الى عشر ايام وهي وصلتني في خلال هالمدة .

لما طلبته كان فيه عرض و لازال العرض موجود و وصل الى ٥٠٪ .

رأي عن البلانر:

البلانر راقي و رايق، التغليف اللي جاني فيه جمال كرتون يحمل شعارهم و داخله هذا البوكس الابيض المنقط باللون الازرق المثلج فخامه ينفع حتى لهديه الطلب و تعاون العملاء كان جيد لما استفسرت عن التراكنق نمبر ( رقم تتبع الشحنه ) يرسلون باللغتين الاسترالي و الانجليزي .

اتمنى لكم ايام منظمة و انجاز واهداف محققه .